Aileu, Iha loron 24 Outubru 2025, Fundasaun Hadomi Timor (FHT) hamutuk ho Asia Centre ho susesu hala’o formasaun lokal dahuluk kona-ba seguransa dijitál iha Timor-Leste iha Salaun ESTV Aileu. Formasaun ne’e halibur estudante, mestre, foinsa’e no membru sosiedade sivíl sira iha Munisipiu Aileu, atividade ne’e remata ho di’ak no partisipantes sira hetan abilidade foun sira hodi bele seguru iha ambiente dijital no online.

Treinamentu ne’e loke husi Diretór ESTV, Sr. Jose da Costa, ne’ebé agradese ba FHT tanba hili Aileu ba formasaun Seguransa Dijital ne’e no husu FHT atu sai parseiru permanente ho ESTV Aileu ba programa sira iha futuru, ESTV Aileu mos orgullu tebes tamba bele sai uma-na’in ba atividade importante ida ne’e no apresia tebes tamba iha vontade atu hasa’e konesementu iha area dijital ba komunidade no foinsa’e sira iha Aileu.

Diretór Ezekutivu FHT, Sr. Nicho Linux mos fahe objetivu sira kona-ba treinamentu ne’e: atu ajuda ema komprende privasidade online, proteje dadus pesoál, uza internet ho responsabilidade, no harii komunidade dijitál ida ne’ebé forte liu, no seguru liu iha Timor-Leste laran tomak. Nia espera partisipante sira, liu-liu foinsa’e sira, sei fahe buat ne’ebé sira aprende ba maluk sira seluk.

Sesaun treinamentu ne’e lidera husi Sra. Kartini Sunityo (Karin) husi Asia Centre baze iha Bangkok – Thailandia, ne’ebé kobre tópiku simples maibé importante hanesan:

– Seguransa online báziku
– Oinsá atu hatene Scam no notísia falsu sira ne’ebé maka baibain mosu iha online
– Password sira ne’ebé forte no evita phishing no
– Diskusaun grupu kona-ba risku lokál no real nebe sempre akontese iha sosiedade

Hafoin treimanentu ne’e, partisipante sira sei simu Sertifikadu Partisipasaun ne’ebé sei asina husi FHT, Asia Centre no Google.

FHT fo agradese wain ba ESTV Aileu, partisipante no ami nia parseiru sira. Atividade ida ne’e foin inisiu no treinamentu ka atividade barak liután sei akontese iha futuru.

Ba informasaun detallu, bele vizita: www.hadomitimor.info.tl