FHT Aprezenta Dezafiu Ameasa Dijital iha Workshop PAN 1325 iha Baucau ho Partisipasaun Membru F-FDTL sira
8 Abril 2026, Fundasaun Hadomi Timor (FHT), liuhusi Diretor Ezekutivu Abrão Monteiro “Nicho Linux”, partisipa no aprezenta iha workshop kontinuidade kona-ba “Dezenvolvimentu Kapasidade kona-ba PAN 1325 Feto, Pas no Seguransa: Responde Dezafiu Seguransa sira ne’ebé Mosu”, ne’ebé organiza husi UN Women iha Kuartel F-FDTL Baucau.
Iha aprezentasaun ne’e, Sr. Nicho Linux foka liu ba dezafiu ameasa dijital ne’ebé afeta seguransa sidadaun sira iha espasu online, liu-liu feto no labarik feto sira, inklui phishing, scam, hacking, doxxing, deepfake no asediu online. Aprezentasaun ne’e la’ós de’it teóriku, maibé mos prátiku, ho objetivu atu ajuda partisipante sira komprende oinsá ameasa dijital mosu, oinsá identifika no oinsá proteje an iha espasu dijital.
Partisipante sira iha workshop ida-ne’e mai husi membru F-FDTL husi unidade oioin iha Baucau, partisipante sira ativa iha diskusaun no simu orientasaun prátiku kona-ba seguransa dijital, inklui maneira atu proteje dadus pesoál, evita atake online no utiliza internet ho seguru liu.
Nicho Linux mos hatudu katak Timor-Leste sei enfrenta hela lakuna iha área seguransa sibernétika no enkuadramentu legal, inklui seidauk iha Lei Krime Sibernétiku no Lei Protesaun Dadus no Privasidade, ne’ebé importante tebes atu proteje sidadaun sira iha era dijital. Tamba ne’e, edukasaun no literasia dijital sai xave atu aumenta reziliénsia komunidade, inklui instituisaun seguransa sira hanesan F-FDTL.
Workshop ida-ne’e kontinua fortalese implementasaun PAN 1325, liu husi integrasaun perspetiva seguransa dijital iha asuntu feto, pas no seguransa. FHT reafirma nia komitmentu atu kontinua kolabora ho UN Women iha Timor-Leste no parseiru sira atu fornese kapasidade, konsiénsia no solusaun prátiku ba ameasa dijital iha nivel nasional no lokal.
Media FHT