FHT sei organiza Diskusaun Inkluzivu kona-ba Esbosu Lei Krime Sibernetiku iha semana ne’e

Fundasaun Hadomi Timor (FHT), ho apoiu husi The Asia Foundation (TAF), sei lidera diskusaun loron rua kona-ba Esbosu Lei Krime Sibernétiku hamutuk ho reprezentante sira husi organizasaun sosiedade sivíl (CSOs), media, profisionál ICT no akadémiku sira iha dia 9 to’o 10 Outubru 2025, Fatin: Salaun ALFELA, Vila Verde, Dili

Diskusaun ne’e ho objetivu atu hametin diálogu inkluzivu entre parte interesada sira kona-ba Esbosu Lei Krime Sibernétiku ne’ebé daudaun ne’e Ministériu Justisa prepara hela. Eventu ne’e sei kria espasu nakloke hodi fahe perspetiva no rekomendasaun sira hodi garante katak lei ne’ebé sei mai la’ós de’it teknikamente efetivu maibé mós konsistente ho valór demokrátiku, prinsípiu direitus umanus no tuir kontestu Timor-Leste nian.

Nu’udar Timor-Leste kontinua nia transformasaun dijitál, dezafiu sira hanesan Scam online, phishing, na’ok identidade, informasaun sala no ameasa sibernétika afeta beibeik ba ema individu, negósiu no instituisaun governu nian. Kazu Scam Centre foin lalais ne’e iha RAEOA – Oecusse provoka nesesidade urjente ba enkuadramentru legal krime sibernétika ida ne’ebé forte, inkluzivu no bazeia ba direitu sira.

Liuhusi programa ne’e, FHT ho nia parseiru sira iha komitmentu atu:
– Fasilita diskusaun inkluzivu entre CSO, media, akademia no peritu sira ICT nian.
– Produz rekomendasaun estratéjiku sira hodi proteje direitus umanus no grupu vulnerável sira, liuliu feto no labarik sira.
– Hametin kooperasaun entre sosiedade sivíl no instituisaun governu sira kona-ba governasaun dijitál.
– Enkoraja konsulta públika no prioritiza atu debate iha parlamentu nasional kona-ba Esbosu Lei Krime Sibernétiku.

Inisiativa ida ne’e hanesan parte ida husi FHT nia programa advokasia ne’ebé la’o hela “Hametin Governasaun, Direitu no Inkluzaun Dijitál iha Timor-Leste” ne’ebé hetan apoiu husi The Asia Foundation (TAF)