FHT Aprezenta Dezafiu Ameasa Dijital Hasoru Feto iha Workshop PAN 1325 iha Kuartel Jeral, Ministeriu Defeza, Fatuhada, Dili
31 Marsu 2026, Fundasaun Hadomi Timor (FHT), liuhusi Diretor Ezekutivu Abrão Monteiro ‘Nicho Linux’, partisipa no aprezenta iha workshop loron 2 (30 – 31 Marsu 2026) ne’ebe organiza husi UN WOMEN kona-ba “Dezenvolvimentu Kapasidade kona-ba PAN 1325 Feto, Pas no Seguransa: Responde Dezafiu Seguransa sira ne’ebé Mosu”, iha Kuartel Jeral, Ministeriu Defeza, Fatuhada, Dili.
Iha aprezentasaun ne’e, Sr. Nicho Linux foka liu ba dezafiu ameasa dijital hasoru feto no labarik feto sira, inklui forma ameasa sira hanesan phishing, scam, hacking, doxxing, deepfake no asediu online, ne’ebé bele afeta seguransa, privasidade no dignidade feto sira iha espasu dijital.
Nicho Linux mos hatudu katak Timor-Leste sei enfrenta hela lakuna boot iha área seguransa sibernétika no enkuadramentu legal, inklui seidauk iha Lei Krime Sibernétiku, Lei Protesaun Dadus no privasidade, no falta estratéjia nasional seguransa dijital, ne’ebé sai risku ba sidadaun sira, liu-liu feto sira ne’ebé barak dala sai alvu ba krime dijital.
Liuhusi esperiénsia no programa FHT nian, iha aprezentasaun ne’e mos kontinua fo importánsia ba literasia no seguransa dijital hodi ajuda komunidade, foinsa’e, organizasaun sosiedade sivil, no instituisaun estadu no governu sira atu identifika, prevene no responde ba ameasa dijital sira. Tamba ne’e FHT kontinua promove kampaña edukasaun, treinamentu nasional no lokal, no diálogu multi-sektór atu hasa’e konsiénsia no kapasidade iha área dijital nian.
Workshop loron rua ne’e, hetan abertura direita husi Tenente Jerál F-FDTL Falur Rate Laek no partisipa husi membru F-FDTL ne’ebe mai husi unidade oioin no Ajente balun husi Ministeriu Defeza, ho objetivu atu fortalese implementasaun PAN 1325 no integra perspetiva feto, pas no seguransa iha resposta ba dezafiu sira ne’ebé mosu, inklui iha espasu dijital.
Importante tebes atu hatete mos katak partisipasaun FHT iha workshop ida ne’e reflete diretamente visaun no objetivu FHT nian, liu-liu iha área promosaun direitu dijital, seguransa online, no inkluzaun dijital ba feto no grupu vulneravel sira. FHT agradese tebes ba UN Women tanba konvida no fo ona oportunidade ba FHT atu envolve hanesan fasilitador iha sesaun seguransa dijital nian, no kontinua iha komitmentu atu kontribui ba dezenvolvimentu sosiedade ida ne’ebé seguru, inkluzivu no resiliente iha era dijital.
Tuir planu UN WOMEN nian katak, FHT sei kontinua aprezenta no fasilita workshop ne’ebe hanesan iha sentru sira seluk inklui Baucau no Metinaru iha loron sira tuir mai, atu asegura konsiénsia no kapasidade kona-ba seguransa, liu-liu ba feto sira, bele hetan apoiu no dezenvolvimentu iha nivel seguransa dijital nian.
